सिरहा, २ वैशाखः सिरहाको लक्ष्मीपुर पतारीस्थित प्रसिद्ध पतारी पोखरीमा बुधबार मेला भर्न लागेको भक्तजनहरूको घुइँचो । सन्तान नभएका महिलाहरूले यस पवित्र पोखरीमा स्नान गर्नाले सन्तान प्राप्ति हु

सिरहा । सन्तान प्राप्तिको कामना गर्दै भाकल गरेका व्रतालु महिलाहरूले सिरहाको लक्ष्मीपुर पतारी गाउँपालिका–४ स्थित पतारी पोखरीमा डुबुल्की लगाएका छन्। हरेक वर्ष वैशाख २ गते यहाँ महिलाहरूको उल्लेखनीय भीड लाग्ने गर्दछ, जहाँ आस्था र परम्पराले विशेष महत्त्व बोकेको छ।
स्थानीय जनविश्वास अनुसार पोखरीमा डुबुल्की लगाउने क्रममा पानीभित्र कुनै वस्तु फेला परे सन्तान प्राप्ति हुने विश्वास छ। सो अवसरमा बाबा हरसिंह देव को पूजा गरिनुका साथै बलीसमेत चढाइने परम्परा रहिआएको छ। यहाँ दनुवार जातिका पुजारी रहने र विधुवा महिलाबाट पूजा गराउने चलन विशेष रूपमा देखिन्छ।
व्रतालु महिलाहरूका लागि धामी–झाक्रीमार्फत स्थानीय भाषामा ‘गुहाईर’ नामक विशेष पूजा गरिन्छ। पोखरीमा डुबुल्की लगाएपछि महिलाहरूले सीमाना पार गरी वस्त्र परिवर्तन गर्ने प्रचलन पनि रहिआएको छ, जसले धार्मिक शुद्धताको संकेत गर्दछ।
गाउँपालिका अध्यक्ष चतुरानन्द ठाकुर का अनुसार सिरहा, सप्तरी, धनुषा, सुनसरी लगायत भारतका विभिन्न स्थानबाट समेत महिलाहरू यहाँ आउने गरेका छन्। राजा हरसिंह देव सँग सम्बन्धित आस्था जोडिएको यस स्थानमा विशेष पूजा तथा मेला लाग्ने गरेको उनले बताए।
यद्यपि आधुनिक वैज्ञानिक युगमा यस्ता विश्वासहरूलाई सबैले स्वीकार नगरे पनि स्थानीय आस्था र सांस्कृतिक परम्पराका कारण प्रत्येक वर्ष यहाँ ठूलो संख्यामा श्रद्धालु महिलाहरूको उपस्थिति रहने गरेको छ ।